झिलझिले(झापा) २३ असोज  ।  शुभदिपावलीको अवसर पारेर आगामी कार्तिक ४ गते झापाको सतासीधामस्थित झिलझिलेमा बृहत सांगितिक कार्यक्रम आयोजना हुने भएको छ । किरात राई यायोक्खा प्रारम्भिक समिति सतासीधामको आयोजनामा कार्यक्रम हुन लागेको हो ।
किराया प्रा.स. सतासीधामको अगुवाईमा अहिले झिलझिलेमा एक सामुदायिक भवन निर्माणाधिन अवस्थामा छ । उक्त भवनको निर्माण कार्य सम्पन्न गर्न सहयोग पुगोस् भनेर कार्यक्रमको आयोजना गर्न लागिएको कार्य्रकम संयोजक सुरज रिङ्गालुङ राईले जानकारी दिए । सामाजिक गतिविधिमा क्रियासिल झापाली यूवा सरोकार समाजले समेत कार्यक्रमका लागी सहकार्य गरेको छ ।
झिलझिले माविमा दिउँसो दुईबजेबाट शुरु हुने उक्त कार्यक्रममा नेपालका चर्चित गायक शिव परियार, हास्यव्यङ्ग्य कलाकार मनोज गजुरेल, नेपाली आईडल बादल लिम्बु, गायिका मेलिना राई, रेवत राई, दआउटसाईडर व्याण्ड धरान र फ्रोजन ब्याण्ड दार्जिलिङको बेजोड प्रस्तुती रहने पत्रकार सम्मेलन मार्फत जानकारी दिइएको छ ।
दिन प्रतिदिन सतासीधाम क्षेत्रमा सामाजिक संघ सस्थाहरु संचालन हुने क्रम बढेका र उपयूक्त सामुदायिक भवन नहुदा समस्या भईरहेकाले निर्माणधिन सामुदायिक भवनलाई पुर्णता दिन सामुहिक प्रयास गरीएको संयोजक राईले बताए ।
कार्यक्रममा झापाको विर्तामोड, सुरुङा, शिवगञ्ज, महाभरा, वैगुनधुरा, पाचगाछी सहित दमक उर्लावारी, पथरी बाट करिव ७ हजार दर्शक सहभागी हुने अपेक्षा गरीएको आयोजकले जनाएको छ ।