काठमाडौं । नेपाली काँग्रेसका वरिष्ठ नेता रामचन्द्र पौडेलले संविधानले दिएको समयभित्र महाधिवेशन गराउन नेतृत्व असफल भएको दाबी गरेका छन् । सोमबार पौडेल पक्षको अनौपचारीक छलपलमा वरिष्ठ नेता पौडेलले नेतृत्व समयभित्र महाधिवेशन गराउन असफल भएको आरोप लगाएका हुन् ।

उनले पहिलेका कार्यतालिका अड्किएको अवस्थामा नेतृत्वले ध्यान दिनुपर्ने जिकिर गरे । अझै अधिवेशन गर्न सकिने दाबी गर्दै उनले १३ औं महाधिवेशनकै क्रियाशील सदस्यहरुलाई मान्यता दिएर अधिवेशन गराउन सकिने र क्रियाशील सदस्यताको विवाद फुकाउन सकिने तर्क गरे ।

उनले भदौ १६ देखि १९ सम्म तोकिएको महाधिवेशन र क्रियाशील सदस्यता विवादबारे सहमति गर्नुपर्ने बताए । नेपाली काँग्रेस भित्र भइरहेका छुट्टाछुट्टै भेला र बैठकले नेपाली काँग्रेसभित्रको विवाद चुलिने आँकलन गरिएको छ ।