काठमाडौं । प्रधानमन्त्री केपी शर्मा ओलीले संवैधानिक इजलासमा अधिवक्ताहरुले तमासा देखाएको आरोप लगाएका छन् ।

एमाले सम्बद्ध युवा संघको केन्द्रीय सचिवालय बैठकलाई सम्बोधन गर्दै ओलीले विपक्षी गठबन्धन र उक्त गठबन्धनसँग आबद्ध बरिष्ठ अधिवक्ताहरूले संवैधानिक इजलासमा तमासा देखाएको भन्दै आक्रोश पोखेका हुन् ।

आफूले लेखेर दिएको फैसला पढेर सुनाउने न्यायाधीश मात्र मान्ने भनेर वितण्डा मच्चाइएको प्रधानमन्त्री ओलीको भनाई छ । ‘हामीले लेखेर दिएको फैसला पढेर सुनाउने न्यायाधीशमात्र मान्छौं भनेर कालोकोटधारीले न्यायपालिकालाई कुन हैसियतमा पुर्‍याउँदैछन् ?’ भन्दै प्रधानमन्त्री ओलीले प्रश्न गरे । ‘यो गम्भीर विषय हो । उनीहरू न्यायाधीश छान्नेमात्र होइन फैसला पनि हामी नै दिन्छौं भन्दैछन्।’ ओलीले भने,

पूर्वप्रधानन्यायाधीशहरूको वक्तव्यबाजीप्रति पनि आपत्ति जनाउँदै प्रधानमन्त्री ओलीले देशलाई पूर्वहरूको विषाक्त विचारबाट मुलुकलाई जोगाइने बताए ।

‘यसअघि न्यापालिकाको नेतृत्व गरेकाहरुको ताण्डव पनि देखिँदैछ । राज्यको पेन्सन खाएर न्यायलापको हुर्मत लिने ? आफ्नो कार्यकालमा केही नगर्ने, अहिले सडकमा हस्तक्षेपकारी ताण्डव गर्ने ? हाम्रो लोकतन्त्रलाई आउटडेटेड इलेमेन्टबाट जोगाइन्छ, जोगाउँछौं ।’ प्रधानमन्त्री ओलील भने,

चुनावका लागि भनेर पपुलिस्ट काम गर्दैनौं
प्रधानमन्त्री ओलीले चुनावका लागि भनेर सरकारले पपुलिस्ट काम नगर्ने बताएका छन् । विपक्षी दलहरुले मध्यावधि निर्वाचन प्रभावित गर्ने गरी लोक रिझाउने बजेट ल्याएको भन्दै आलोचना गरिरहेका बेला प्रधानमन्त्री ओलीले त्यसको खण्डन गर्दै यस्तो बताएका हुन् ।

बैठकलाई सम्बोधन गर्दै प्रधानमन्त्री ओलीले भने, ‘जनताको सेवा होइन, भोट आकर्षित गर्ने घटिया काम गर्दैनौं, त्यस्तो घटिया काम सरकारले गर्दैन ।’ ओलीले भने, ‘एउटा चुनाव जितित्छ कि हारिन्छ भनेर होइन लोकतन्त्र जित्छ र हार्छ भनेर हेर्छ । लोकतन्त्र जिताउन चाहन्छ ।’