काठमाडौं । नेपालमा कोरोना भाईरस (कोभिड-१९) संक्रमणको जोखिम बढ्दै गएको भन्दै सरकारले रोकथामका लागि विभिन्न क्षेत्रमा नयाँ पामदण्डहरु बनाउन थालेको छ ।

कोरोनाको जोखिम उच्च हुँदै गएपछि सरकारले डान्सबार दोहोरी साँझहरु अर्को सूचना जारी नहुँदासम्मका लागि बन्द गर्नुपर्ने निश्कर्ष निकालेको हो ।

शनिबार सिंहदरबारमा बसेको कोभिड १९ संकट व्यवस्थापन केन्द्र (सीसीएमसी) को बैठकले डान्सबार र दोहोरी साँझ बन्द गर्न मन्त्रिपरिषद्समक्ष सिफारिस गर्ने निर्णय गरेको छ ।

सीसीएमसीको सिफारिस अनुसार रेष्टुरेन्टहरुको हकमा भने सुरक्षा मापदण्ड अपनाएर राति १० बजेसम्म खोल्न दिने र त्यसपछि भने बन्द गर्नुपर्ने भएको छ ।

यसअघि स्वास्थ्य मन्त्रालयले गत चैत २५ गते जारी गरेको अपीलमा राति ९ बजेपछि रेष्टुरेन्टहरु बन्द गर्न अपील गरिएको थियो । त्यसैगरी बैशाख २ गते मन्त्रालयले जारी गरेको अर्को अपीलमा काठमाडौं लगायत १४ जिल्लालाई अति जोखिमयुक्त घोषणा गरेको थियो । यी जिल्लाहरुमा भीडभाड हुने क्षेत्रमा नजान सर्वसाधारणलाई अपिल पनि गरिएको थियो ।

सीसीएमसीका सचिव खगराज बरालका अनुसार मन्त्रालयको यही सिफारिसलाई भ्यान दिँदै शनिबारको सीसीएमसी बैठकले शहरी क्षेत्रका विद्यालयहरु भौतिक रुपमा सञ्चालन नगरी अनलाइन कक्षाहरू मात्रै सञ्चालन गर्न सिफारिस गरिएको हो ।

आज बसेको सीसीएमसीको बैठकले शहरी क्षेत्रका विद्यालयहरुमा वैकल्पिक विधिबाट पठनपाठन गर्नुपर्ने निष्कर्ष निकालेको हो । यसबारे अब बस्ने मन्त्रिपरिषद्ले औपचारिक निर्णय गर्न मन्त्री ढकालले जानकारी दिए ।

बैठकमा स्वास्थ्य तथा जनसंख्या मन्त्रालयले पेश गरेको कोभिड—१९ को संक्रमण रोकथामसम्बन्धी आदेशबारे छलफल भएको हो ।

प्रधानमन्त्री कार्यालयका सचिव खगराज बरालले भने ‘धेरै संक्रमण देखिएको ठाउँहरुमा तत्कालका लागि वैकल्पिक विधिमार्फत विद्यालयहरुमा पठनपाठन गर्नुपर्छ भन्ने छलफल भएको छ’ उनले भने, ‘अब क्याबिनेटले आवश्यकता अनुसार निर्णय गर्छ ।’