मुम्बई। बलिउडमा प्रायः महंगो विवाहको बारेमा समाचार आइरहन्छन् । तर के तपाईंलाई थाहा छ, जसरी फिल्मी कलाकारहरु आफ्नो विवाहलाई भव्य बनाउन पानीजस्तै पैसा बगाउछन्, सम्बन्धविच्छेदमा पनि उनीहरुको उस्तै गरी पैसा खर्च हुने गरेको छ ।

अमर उजालाले बलिउडका १० जोडीको महंगो सम्बन्धविच्छेदका बारेमा समाचार तयार पारेको छ ।

अभिनेता ऋतिक रोशन र उनकी पत्नी सुजैनको सम्बन्धविच्छेद भारतमा मात्र नभई विश्वमै महंगो सम्बन्धविच्छेदको रुपमा गनिन्छ ।

दुवैको विवाह सन् २००० मा भएको थियो र ऋतिकको अफेयरको चर्चासँगै उनीहरुको सम्बन्धविच्छेद भयो । सुजैनले एलिमनीका रुपमा ४ सय करोड रुपैंयाँ मागेकी थिइन् । पछि आपसी सहमतिमा ऋतिकले उनलाई ३ सय ८० करोड रुपैंयाँ दिएका थिए ।

अभिनेत्री करिश्मा कपूरले वैवाहिक जीवनको एघार वर्ष पछि सन् २०१६ मा पति सञ्जयसँग सम्बन्धविच्छेद गरिन् । सम्बन्धविच्छेदको समयमा करिश्मा र उनका पतिबीच १४ करोड रुपैंयाँको सम्झौता भएको थियो । जसअनुसार व्यापारी सञ्जय हरेक महिनामा करिश्मालाई १० लाख रुपैंयाँ दिइरहेका छन् । यो पैसा उनीहरुको दुई सन्तानको हेरचाहमा खर्च हुने गर्दछ ।

बलिउड निर्देशक तथा अभिनेता फरहान अख्तर र उनकी पत्नी अधुनाको सम्बन्धविच्छेदको समाचार सार्वजनिक हुँदा उनका फ्यानहरु चकित परेका थिए ।

किनकी यो जोडीले विवाहको करिब १६ वर्षपछि अलग्गिने निर्णय लिएका थिए । यसअघि न फरहान न त अधुनाको नै अफेयरको चर्चा थियो ।

सम्बन्धविच्छेदपछि अधुनाले मुम्बईस्थित १ हजार स्क्वायर फीटमा बनेको घर आफ्नो नाममा हुनुपर्ने माग राखिन् । यसबाहेक फरहान आफ्नो छोरीको स्याहारसुसारका लागि हरेक महिना मोटो रकम दिने गरेका छन् ।

विवाहको जस्तै अभिनेता सैफअली खान र अभिनेत्री अमृता सिंहको सम्बन्धविच्छेदले पनि निकै चर्चा पाएको थियो । उमेरले १३ वर्ष जेठी अमृतासँग विवाह गरेको करिब १३ वर्षमा नै सैफले अलग्गिने निर्णय लिए ।

एक अन्तरवार्तामा सैफल सम्बन्धविच्छेदको समयमा ५ करोड रुपैंयाँ एलिमनी दिने सम्झौता भएको र जसमा २ दशमलब ५ करोड रुपैंयाँ दिइसकेको बताएका थिए । उनले हरेक महिना १ लाख रुपैंयाँ छोराछोरीको हेरचाहनका लागि दिने गरेका छन् ।

रिया पिल्लई अभिनेता सञ्जय दत्तको दोस्रो पत्नी थिइन् । सञ्जय रियालाई निकै प्रेम गर्थे । सम्बन्धविच्छेदको निकै लामो समयसम्म सञ्जयले रियाको खर्च व्यहोर्दथे ।

सम्बन्धविच्छेदपछि उनले रियालाई कति रुपैंयाँ दिए भन्ने कुरा हालसम्म खुल्न सकेको त छैन । तर बुझिए अनुसार सबैभन्दा महंगो कारसँगै सञ्जयले ४ करोड रुपैंयाँ दिएका थिए ।

अभिनेता सञ्जयसँग सम्बन्धविच्छेद पछि रियाले टेनिस खेलाडी लिएण्डर पेससँग विवाह गरेकी थिइन् । तर यो सम्बन्ध पनि लामो समय टिकेन र दुवै अलग्गिए ।

लिएण्डरसँग अलग्गिदा रियाले हरेक महिना ४ लाख रुपैंयाँ दिनुपर्ने माग राखेकी थिइन् । जसमा ३ लाख रुपैंयाँ आफ्ना लागि र ९० हजार छोरीको पढाईका लागि थियो । प्रख्यात फिल्म निर्माता र रानी मुखर्जीका पति आदित्य चोपडाले आफ्नो पत्नी पायलसँग सम्बन्धविच्छेद गर्दा ५० करोड रुपैंयाँ दिएका थिए ।

अभिनेता, निर्देशक तथा कोरियोग्राफर प्रभु देवाले सन् २०११ मा रमलतासँग सम्बन्धविच्छेद गरे । उनले एलिमनीको रुपमा रमलतालाई एक लाख रुपैंयाँ मात्र दिए । यो पैसासँगै उनले २० देखि २५ करोड रुपैयाँको सम्पत्ति पनि दिए ।

बलिउडका मिस्टर परफेक्शनिस्ट आमिर खानले आफ्नो परिवारको विरुद्ध गएर सन् १९८६ मा रीना दत्तसँग विवाह गरे । तर केही वर्षमै दुवैबिच खटपट भयो र सन् २००२ मा उनीहरुले सम्बन्धविच्छेद गरे । आमिरले सम्बन्धविच्छेदको समयमा रीनालाई ५० करोड रुपैयाँ दिएका थिए ।

बलिउडको हट जोडीका रुपमा चिनिएका अरबाज खान र मलाइका अरोडको सम्बन्धविच्छेद पनि महंगो मानिन्छ । समाचार अनुसार सम्बन्धविच्छेद पछि मलाइकालाई अरबाजले १५ करोड रुपैंयाँ दिएका थिए ।