काठमाडौं । नेकपा उपाध्यक्ष वामदेव गौतमले आफूविरुद्ध परेको रिट खारेज भएपछि सबैमा आभार प्रकट गरेका छन् । आज सामाजिक सञ्जालमार्फत उनले आफूप्रति शुभेच्छा र सद्भाव प्रकट गर्ने सबैमा आभार प्रकट गरेका हुन् ।

गौतमले भनेका छन्, ‘राष्ट्रियसभा सदस्य पदमा मेरो मनोनयन र शपथ लगत्तै मलाई थप संवैधानिक जिम्मेवारी नदिइयोस् भनी सर्वोच्च अदालतमा केही विद्वान अधिवक्ताहरुले दायर गर्नुभएको रिट उपर जारी भएको अन्तरिम आदेश आज सोही अदालतको संवैधानिक इजलास ले खारेज गरेको छ ।’

उनले यो विषय कुनै पद र प्रतिष्ठासँग गाँसिएको नभई पार्टीभित्र विधि र पद्धति स्थापित गर्ने अभियानमा सरिक भइरहेको बेला प्रत्येक विषयलाई पद र व्यक्तिगत प्रतिष्ठासँग गाँसेर विधि र पद्धतिका कुरालाई विषयान्तर गर्न केही व्यक्तिहरु क्रियाशील भएका कारण यस्तो भएको बताएका छन् । ‘फेरि पनि म संविधानको सर्वोच्चता तथा विधि र पद्धतिका पक्षमा दृढताका पूर्वक उभिइरहने प्रण गर्दछु,’ गौतमले सङ्कल्प गरेका छन् ।