चीनका लागि नेपाली राजदुत लिलामणी पौडेललाई मन्त्रीपरिषद्को बैठकले १५ दिनभित्र नेपाल फर्कन निर्देशन सहित फिर्ता बोलाउने निर्णय गरेको छ ।

उनको ठाँउमा पूर्व परराष्ट्रमन्त्री महेन्द्र बहादुर पाण्डेलाई पठाउने निर्णय पनि सरकारले गरेको छ । यो निर्णय गर्दा उनले पार्टीमा कुनै छलफल नगरेको स्रोतको भनाई छ । परराष्ट्रमन्त्री प्रदीप ज्ञवालीबाट सिधै प्रस्ताव ल्याएर पौडेललाई फिर्ता बोलाउने र उनको ठाँउमा पाण्डेलाई पठाउने निर्णय क्याविनेटले गरेको हो । तर पौडेललाई फिर्ता बोलाइनु पर्ने र त्यसमाथी पनि म्याद नै किटान गरेर बोलाउनुको कारणबारे क्याबिनेट बैठकमा न प्रधानमन्त्रीले केही बोले, न परराष्ट्र मन्त्री प्रदीप ज्ञवालीले नै मन्त्रीहरुलाई जानकारी दिए ।

बैठकमा सहभागी एक मन्त्रीका अनुसार, पौडेललाई फिर्ता बोलाउने बारे यस अगाडीको क्याबिनेटमा पनि कहिले कहिले सामान्य छलफलका रुपमा विषय प्रवेश गर्दथे । तर आइतबारको बैठकमा प्रधानमन्त्रीको निर्देशनमा सिधै परारष्ट्रमन्त्री ज्ञवालीले चीनका राजदुतलाई १५ दिनभित्र फिर्ता बोलाउने र त्यहाँ महेन्द्र बहादुर पाण्डेलाई पठाउने प्रस्ताव ल्याएका थिए ।