काठमाडौं । समसामयिक राजनीति र अर्थतन्त्रलाई विश्लेषण गर्दै नेपाली कांग्रेसका नेता तथा पूर्व अर्थमन्त्री डा. रामशरण महतले लेखेको पुस्तक सार्वजनिक भएको छ ।

बुधबार काठमाडौंमा एक समारोहका बिच पूर्व राष्ट्रपति रामवरण यादवले उक्त पुस्तक (ट्रेल्स, ट्रेमोर्स एण्ड होप) को बिमोचन गर्नु भएको हो । पुस्तकमा नेपालको अर्थतन्त्र, व्यापारघाटा लगायत अर्थराजनीतिलाई समेटिएको छ । बिमोचन कार्यक्रममा पूर्व राष्ट्रपति यादवले उक्त पुस्तकमा समावेश गरिएका विषयले देशको आर्थिक विकासमा योजना बनाउन र कार्यान्वयन गर्न सहयोग पु¥याउने विश्वास समेत व्यक्त गर्नुभयो ।

त्यस्तै उहाँले कृषि तथा पूर्वाधार विकासको कुरा गर्ने तर जलवायु परिवर्तनको कुरा छुटाउने प्रवृति नेपालको राजनीतिमा रहेको बताउनुभयो । उहाँले यसलाई राजनीतिक व्यक्तिहरुको रोगको रुपमा विश्लेषण गर्दै यस्तो किताबमा जलवायु परिवर्तन र यसले अर्थतन्त्रमा पारेको प्रभावलाई समेत समेटन सुझाव दिनुभयो ।

पछिल्लो समय राजनीति सक्रिय अर्थविदहरुको पुस्तकहरुमा देशको आर्थिक विश्लेषण सँगसँगै आफ्नो राजनीतिक धार पनि प्रस्तुत हुने हुँदा यसको अध्ययन गर्नेहरुमा भ्रम सिर्जना हुन थालेको भन्दै विश्लेषकहरुले टिप्पणी गर्ने गरेका छन् । सत्ता बाहिर रहेका पूर्व अर्थमन्त्रीहरुको टिप्पणी र सत्तामै रहेका अर्थमन्त्रीको देशको समसामयिक आर्थिक विश्लेषणमा फरक देखिनु यसको संकेत हो ।