दुप्चेश्वर । नेपाल भ्रमण वर्षलाई लक्षित गर्दै नुवाकोटको दुप्चेश्वर गाउँपालिकाले आफ्नो क्षेत्रमा पर्यटन प्रवद्र्धनका लागि ट्राउट माछा र समुन्द्रफिनी चामल क्षेत्र स्थापित गर्ने योजना बनाएको छ ।

अङ्ग्रेजी नयाँ वर्ष सन् २०२० मा हुन लागेको नेपाल भ्रमण वर्षलाई लक्षित गर्दै पर्यटन प्रवद्र्धनका लागि पर्याप्त सम्भावना भएको गाउँपालिकाले ट्राउट माछा र स्थानीय जातको समुन्द्रफिनी चामल उत्पादन गरेर आकर्षण गर्ने नयाँ योजना ल्याएको हो । वडा नं १ घ्याङ्फेदीस्थित तालुकसेरीबाट तादी खोलामा २० हजार ट्राउट माछाका भुरा छाडेर माछा ‘जोन’ बनाउने र शिखरवेंशीको फाँटमा चामलका लागि प्रख्यात रहेको समुन्द्रफिनी धानको यस वर्षदेखि नै शुरु गरिएको व्यावसायिक खेतीमा किसानलाई प्रोत्साहन गरेर पर्यटकलाई आकर्षण गर्ने कार्यक्रम चलाउन लागिएको गाउँपालिका उपाध्यक्ष अञ्जु आचार्यले जानकारी दिनुभयो ।

उहाँका अनुसार तादी खोलाको तालुकसेरीबाट आगामी पुस अन्तिममा २० हजार ट्राउट माछाका भुरा छाडेर हुर्किएपछि पर्यटकले आफँैले माछा मार्न पाउने व्यवस्था मिलाउने र त्यसको साथमा समुन्द्रफिनी चामलको खाना खुवाउन नयाँ स्वादमा पर्यटक लोभ्याउन लागिएको छ । “तालुकसेरीबाट तादी खोलामा छाडिएका भुरा माछा आफैँ हुर्किएर करीव १० महिनाको अवधिमा मिश्र भञ्याङदेखि समुन्द्रटारसम्म पर्यटक आफैँले माछा मार्न पाउने सन्देश दिएर जिल्लामा पर्यटक भित्र्याउन लागिएको छ”, उहाँले भन्नुभयो, “गाउँपालिकाले माछा र चामलमार्फत पर्यटकलाई नयाँ स्वाद दिने र धार्मिक तथा पर्यटकीयस्थलको प्रचारलाई पनि सँगसँगै अघि बढाउन आवश्यक तयारी थालिएको छ ।”

पर्यटन प्रवद्र्धन गर्न गाउँपालिका अध्यक्ष योविन्द्रसिंह तामाङको संयोजकत्वमा समिति गठन गरेर नुवाकोटमा पर्यटक भित्र्याउन अन्य स्थानीयतहसँग समेत समन्वय गर्ने योजना बनाएको छ । अध्यक्ष तामाङका अनुसार समितिले दुप्चेश्वर महादेव, बच्छलादेवी, गाउँखर्कको मिनी–दुप्चेश्वरलगायतका मुख्यमुख्य धार्मिक स्थल, लाङ्टाङ राष्ट्रिय निकुञ्ज, गोसाइँकुण्ड पदमार्ग, घ्याङफेदीको घरवासमा बसेर तामाङ बस्ती, सागरकुण्ड, कुटुमसाङ लगायतका स्थलको प्रचारप्रसार गरेर भ्रमण वर्ष सफल बनाउन महत्व दिइएको छ ।