नेपालीहरुको घुम्ने प्रवृत्ति बढेसँगै विभिन्न टुर एण्ड ट्राभल्स कम्पनीहरुले पनि उनीहरुलाई बजेट सुहाउँदो प्याकेजहरु सार्वजनिक गरिरहेका छन् । अझ केही वर्षयता अन्य समयमा भन्दा दशैंतिहार का समयमा त्यस्ता प्याकेजहरु अफरसहित आउने गर्छन् ।

दशैं र तिहारको बीचमा स्कुल, क्याम्पसजस्ता शैक्षिक संस्थाहरु बन्द हुने हुँदा यो अफर विद्यार्थीहरुका लागि अझ विशेष पनि बन्न सक्छ ।
यो दशैंको बिदामा विदेश घुम्न जाने सोचमा हुनुहुन्छ भने छनोट गर्नुस् स्थान । जहाँ पुग्नका लागि खर्च कति लाग्छ र कति दिन घुम्न पाउनुहुनेछ ।

विभिन्न ट्राभल्सले आफ्ना आफ्नै विशेषता देखाउँदै विदेश घुम्नका लागि अफर गरिरहेका छन् । दर्जनौ ट्राभल्सले आफ्ना विभिन्न सेवासुविधा सहित दशैं अफरमा प्याकेज बनाएर विदेश घुमाइरहेका छन् ।

दशैंमा सरकार र निजी क्षेत्रका अधिकांशजसो कार्यालयहरु फूलपातीदेखि बन्द हुनेछन् । फूतपाती शनिवार रहेको छ । त्यसैले तपाई विदामा विदेश जाने तयारी गरिरहनु भएको छ भने कहाँ जाने र कति खर्च लाग्छ भन्ने बारे खोज गरिरहनु भएको हुन सक्छ । त्यसलाई मध्यनजर गर्दै हामीले यसबारे जानकारी दिने प्रयास गरेका छौं ।

काठमाडौंको दरबारमार्गमा रहेको प्रसिडेन्ट ट्राभल्स एण्ड टुर्सले दशैं तिहार बिदामा विदेश घुम्न जाने नेपालीका लागि ५० हजारदेखिको टूर प्याकेज ल्याएको छ ।

युरोप, अमेरिका र अष्ट्रेलिया घुम्न जानेहरुको संख्या अत्याधिक रहेको टुर्सकी टुर म्यानेजर अञ्जली खनालले जानकारी दिइन् ।

प्रेसिडेन्टले अहिले १८ वटा प्याकेज ल्याएको छ । घुम्ने चाहना हुनेहरुले एकमुष्ट रकम तिरेपछि होटल एकुमेन्डसन, घुम्नका लागि ट्रान्सपोटेशन सबै टुर्सले दिनेछ भने घुम्न जाँदाजाँदै बिरामी भएको खण्डमा ट्राभल्स इन्स्युरेन्सको समेत व्यवस्था रहेको हुन्छ ।

प्रेसिडेन्ट ट्राभल्सले जस्तै अन्य थुप्रै ट्राभल्सले दशैंतिहारका लागि प्याकेज ल्याएका छन् । जसमा अनलाइन बुकिङपनि गर्न सकिने सुविधा रहेका छन् भने ट्राभल्समै गएर बुझ्न समेत सकिनेछ ।

सिंगापुर

विदेश घुम्न जानेहरुका लागि सिंगापुर पहिलो रोजाइमा पर्छ । सिंगापुरमा नेपालीहरु धेरैमात्रामा घुमफिरकै लागि पुग्ने गर्छन् । सिंगापुर जानका लागि भिसा लगाउन सजिलो भएकाले पछिल्ला समय सपिङ गर्नकै लागि पनि नेपालीहरु जाने गरेका छन् ।

मलेसियासँग जोडिएकाले सिंगापुर विकास र प्रकृतिप्रेमीका लागि आकर्षक गन्तव्य पनि हो । विकास, समुन्द्र र सपिङ पर्यटकहरुको मुख्य आकर्षक हो ।

सिंगापुर घुम्न जानका लागि ५ रात ६ दिन भए पुग्ने छ भने त्यसका लागि ४२ हजार ५ सय रुपैयाँ खर्च लाग्छ ।

थाइल्याण्ड

नेपालीहरु घुम्न जाने अर्को रोजाइको देश थाइल्याण्ड हो । नव विवाहित दम्पत्तिदेखि परिवार समेत थाइल्याण्ड पुग्छन् रमाउन । अझ दशैंमा प्रशस्त समय भएकाले थाइल्याण्ड घुम्न जानेहरु बढिरहेका पनि छन् ।

थाइल्याण्डको मुख्य विशेषता भनेको सामुन्द्रिक आनन्द हो । त्यसकारण पनि नेपालीहरु सामुन्द्रिक आनन्द लिन पनि थाइल्याण्ड पुग्छन् । त्यतिमात्र होइन, थाइल्याण्डका चर्चित पर्यटकीय गन्तव्य राजधानी बैंकक, पटाया र फुकेट हुन् । थाइल्याण्ड घुम्नका लागि ४ रात ५ दिन भए पुग्छ । साथै घुम्न रु ५० हजार खर्च भए पुग्नेछ ।

युएई

पछिल्ला समय संयुक्त अरब इमिरेट्स पर्यटकहरुका लागि आकर्षक बन्दै गएको छ । युएईका मुख्य आकर्षण भनेको डिजर्भ सफारी हो । मुस्लिम देश भएकाले पनि युएईमा विकिनी लगाएर हिड्ने स्वतन्त्रता छ ।

युएई पूर्वी एसियाको व्यापारिक केन्द्र पनि हो । नेपालीहरु श्रमका लागि पनि युएई पुग्ने गर्छन् ।

सिंगापुर, थाइल्याण्ड र मलेसियाको तुलनामा यूएईमा भिसा लगाउन भने केही कठिन छ । युएई घुम्नका लागि ट्राभल एजेन्सीहरुले ४ रात ५ दिनका लागि ६० हजार रुपैयाँको प्याकेज ल्याएका छन् ।

गोवा (भारत)

भारतको गोवा पनि नेपाली पर्यटकहरुको आकर्षणको केन्द्रविन्दू हो । बिना भिसा जान सकिने भएका कारण नेपालीहरुको रोजाइमा गोवा पर्ने गरेको छ ।

गोवामा गएर सामुन्द्रिक मस्तीको मज्जा लिन सक्छन् । ट्राभल्स एजेन्सी मार्फत जाँदा ८० हजार रुपैयाँमा ५ दिनसम्म घुम्न पाइने प्याकेज ल्याएका छन् ।

चीन

चीनको बेजिङ घुम्नका लागि उपयुक्त स्थानमध्ये एक हो । बेजिङमा रहेको ग्रेट वाल अफ चाइनाले विश्वकै ध्यान आकर्षण गर्न सक्छ ।
यसका साथै चीनको विकास र त्यहाँको सँस्कृति अवलोनका लागि पनि चीन उपयुक्त गन्तव्य बन्न सक्छ । ६ दिनको विदा लिएर गएमा चीनका अन्य स्थानमा समेत आनन्दले घुम्न सकिन्छ । त्यसका लागि १ लाख २५ हजार लाग्ने एसियन ट्राभल्स एण्ड टुरले जनाएको छ ।

दार्जलिङ, आसाम (भारत)

त्यस्तै छिमेकी मुलुक भारतका विभिन्न स्थानमा पनि दशैंको विदामा जाने नेपालीको संख्या उल्लेख्य हुने गरेको छ । दार्जलिङ, आसाम, गुवाटीका लागि करिब २० हजारमा लान सकिने ट्राभल एण्ड टुरले जनाएको छ ।