विश्व क्रिकेट त्यति बेला स्तब्ध बनेको थियो, जति बेला जमैकाको होटलको कोठामा पाकिस्तानी प्रशिक्षक बब उल्मर अचेत भेटिए। किङ्सटन अस्पतालमा पुगेलगतै ५८ वर्षे उल्मरलाई मृत घोषित गरियो। दिन थियो, सन् २००७ मार्च १८।

सन् २००७ को विश्वकप वेस्ट इन्डिजमा आयोजना भएको थियो । कुनै समय उनी इङ्ल्यान्डको राष्ट्रिय टोलीका खेलाडी र दक्षिण अफ्रिकी राष्ट्रिय टोलीका प्रशिक्षक पनि थिए । विश्व क्रिकेटमा उल्मरलाई अहिलेसम्मकै सबैभन्दा उत्कृष्ट प्रशिक्षक मानिन्छ। उनले क्रिकेटमा प्रशिक्षणलाई नयाँ र फरक मोड दिएका थिए ।

मार्च १७ मा पाकिस्तान र आयरल्यान्डबीचको खेल थियो । उक्त खेलमा पाकिस्तानी टोली अप्रत्याशित रूपमा आयरल्यान्डसँग डकवर्थ एन्ड लेविस नियमका आधारमा तीन विकेटले पराजित हुन पुग्यो । सोही कारणले पाकिस्तान विश्वकपको उपाधि होडबाट बाहिरिन पुग्यो । त्यो हारले पाकिस्तानी क्रिकेटमा ठूलै खैलाबैला मच्चायो । पाकिस्तानी खेलाडी र पदाधिकारीहरूले हारको दोष प्रशिक्षक बब उल्मरमाथि थोपरे ।

विश्वकपबाट बाहिरिएपछि पाकिस्तानी टोलीभित्रै असहज स्थिति सिर्जना भएको थियो । संयोगले पाकिस्तानी टोली विश्वकपबाट बाहिरिएको केही समयपछि नै मार्च १८ मा जमैकास्थित आफू बसेको होटलमा प्रशिक्षक बब उल्मरको रहस्यमयी तरिकाले निधन भयो । उनको मृत्यु शंकाको घेरामा पर्‍यो । प्रशिक्षक बब उल्मरलाई विष दिएर मारिएको आरोप लगाउनेको जमात पनि निकै ठूलो थियो ।

मृत्यु हुनुअघि बब उल्मरले बान्ता पनि गरेका थिए । सोही कारणले जमैकन प्रहरीले उनको मृत्युको विषयमा अनुसन्धान सुरु गर्‍यो । विश्वकप सकिएको लामो समयसम्म पनि उनको मृत्युको विषयमा अनुसन्धान जारी रह्यो । निकै लामो अनुसन्धानपछि जमैकन प्रहरीले बब उल्मरको स्वाभाविक मृत्यु भएको र उनको निधनमा कसैको हात नरहेको निष्कर्ष निकालेको थियो ।

उनको मृत्युपछि पनि विश्वकप चलिरह्यो। मृत्युको तीन दिनपछि पाकिस्तानले जिम्बावेविरुद्ध खेल्यो पनि। सन् १९९२ को विश्वकप विजयी पाकिस्तानी टिमका एक सदस्य इन्जमामले उल्मरको मृत्युको रात नै वान डे क्रिकेटबाटै संन्यास लिएका थिए।