दोलखा – गौरीशङ्कर गाउँपालिकामा हुन लागेको बाल विवाह रोकिएको छ । इलाका प्रहरी कार्यालय सिङ्गटिका इन्चार्ज प्रहरी निरीक्षक सुनजित तामाङको पहलमा आइतबार हुन लागेको बाल विवाह रोकिएको हो । 

बाल विवाह हुन लागेको भनी जिल्ला प्रहरी कार्यालय दोलखामा उजुरी परेपछि उजुरी उपर इलाका प्रहरी कार्यालय सिङ्गटिले छानबिन सुरु गरेको थियो । 

शनिबार दुवै पक्षका अभिभावक, प्रहरी र जनप्रतिनिधिबीच भएको छलफलमा उमेर पुगेपछि मात्रै विवाह गर्ने सहमति भएको छ । छलफलमा इलाका प्रहरी कार्यालयका इन्चार्ज प्रहरी निरीक्षक सुनजित तामाङले मुलुकी अपराध संहिता ऐनबारे जानकारी गराउनु भएको थियो ।

छलफलमा सहभागी अभिभावकहरुले कानुनी अज्ञानताको कारण विवाह तय भएको बताएका थिए । हुनै लागेको बाल विवाह रोक्न सहयोग र कानुनबारेसमेत जानकारी प्रदान गरेको भन्दै अभिभावकले प्रहरीलाई धन्यवाद दिएका थिए । छलफल पश्चात अभिभावकले प्रहरीलाई धन्यवाद दिँदै उमेर पुगे पछि हुने विवाहमा प्रहरीलाई समेत निमन्त्रणा गर्ने बताएका थिए । 

१९ वर्षीया युवती र १८ वर्षीय युवकको विवाह तय भएको थियो ।