काठमाडौं – देश विखण्डनको माग गर्दै आएका सीके राउतसँग सरकारले गरेको सहमति त्रूटिपूर्ण रहेको भन्दै नेकपाकै सांसदले सच्चाउन माग गरेका छन् ।

आइतबारको प्रतिनिधिसभा बैठकको विशेष समयमा बोल्दै नेकपाका सांसद भीम रावलले विभिन्न समुदायलाई वार्तामा ल्याउनु र मूल प्रवाहमा ल्याउनु राम्रो र स्वागत योग्य कुरा भएपनि त्यसमा प्रयोग भएको भाषामा आपत्ति जनाए ।

उनले सहमतिमा प्रयोग भएका भाषा नेपालको संविधानअनुकूल नभएको दाबी गरे ।

‘सरकारले सीके राउतसँग सहमति गरेको थाहा पायौं । विभिन्न समुदायलाई वार्तामा ल्याउनु र मूल प्रवाहमा ल्याउनु राम्रो र स्वागत योग्य कुरा हो’ रावलले संसद बैठकमा भने,‘त्यो सहमतमिा प्रयोग गरिएका शव्दहरु नेपालको संविधान अनुकुल छैनन् । नेपालको स्वाधिनता र स्वतन्त्रताको प्रतिकुल छ ।’

सांसद रावलले संविधानको धारा पाँचमा राष्ट्र हित प्रतिकुलको आचरण र कार्य संघीय कानून बमोजिम दण्डनीय भएको बताए ।

‘सीके राउतले नेपालको एकता अखण्डताका विरुद्धमा सकेसम्म विष वमन गर्नुभएको छ’ रावलले भने,‘ दुखका साथ भन्नु पर्छ उहाँले राष्ट्रिय सभामा गरेको सहमतिमा कतै पनि आफूले विगतमा देशको विरुद्धमा ओकलेका विषहरु फिर्ता लिएँ भन्नु भएको छैन ।’

नेता रावलले राउतसँगको सहमतिमा भएको त्रुटीहरु सच्चाउन माग गरे ।