बैतडी – बैतडीका स्थानीय तहका वडाहरुमा सचिव नहुँदा सेवाप्रवाहमा समस्या भएको छ ।

स्थानीय तहमा जनप्रतिनिधि आएको डेढ वर्ष भइसके पनि कर्मचारीको भने अभाव रहेको छ । वडामा सचिवमा नहुँदा पञ्जिकरणलगायतका कामहरु प्रभावित हुने गरेका जनप्रतिनिधिहरुले बताएका छन् । बैतडीका दशवटै स्थानीय तहका वडा तहमा सचिव नहुँदा प्राविधिक सहायकहरुले सचिवको काम गरिरहेका छन् । 

शिवनाथ गाउँपालिकाका ६ ओटै वडामा सचिवको काम प्राविधिक सहायकले गरिरहेका गाउँपालिकाकी उपाध्यक्ष कुष्मा चन्दले जानकारी दिनुभयो । सचिवको अभावमा वडाले गर्नुपर्ने काममा बाधा पुगेको उहाँको भनाई छ ।

८ वडा रहेको सुर्नया गाउँपालिकाका ३ वडामा सचिव नभएको गाउँपालिकाकी प्रवक्ता हेमन्ती भट्टले बताउनुभयो । वडा नं १, ७ र ८ मा सचिव नहुँदा एकजना सचिवले दुई दुई वडामा काम गर्नुपरेको उहाँको भनाई थियो ।

सिगास गाउँपालिकाका ७ वटा वडा सचिवविहीन रहेको गाउँपालिकाका उपाध्यक्ष द्रोपती चन्दले बताउनुभयो । यस्तै पाटन नगरपालिकाको वडा नं ७ र ८ मा सचिव छैनन् भने दशरथचन्द नगरपालिकाकाको पनि वडा नं ६ र ११ मा सचिव नभएका दशरथचन्द नगरपालिकाका उपप्रमुख मीना चन्दले जानकारी दिनुभयो ।